Concepción de la Rúa jakitunak zuzendutako taldeak Europako lehenengo Homo sapiens biztanleetako baten fosilaren mitogenoma berreskuratu du

Concepción de la Rúa jakitunak zuzendutako taldeak Europako lehenengo Homo sapiens biztanleetako baten fosilaren mitogenoma berreskuratu du

UPV/EHUko Biología Evolutiva Humana taldeak Errumaniako Pestera Muierii haitzuloan aurkituriko 35.000 urteko fosil baten genoma mitokondriala berreskuratzea lortu du. Fosilduriko emakume haren leinua, hain zuzen ere, Homo sapiens-a Afrikatik Eurasiara zabaldu ondoren Europan bizi izan zen lehen populaziokoa zen, eta horrek indartu egiten du Goi Paleolitoan Afrikara itzultzeko migrazio bat izan zelako hipotesia. Azterlana Scientific Reports aldizkarian argitaratu da.

Concepción de la Ruak zuzentzen du Zientzia eta Teknologia Fakultateko Biología Evolutiva Humana taldea, Suediako, Holandako eta Errumaniako ikertzaileekin batera. Talde horrek egin duen paleogenomikako azterlanari esker, Pestera Muierii (PM1) emakumearen mitogenomaren sekuentzia osoa berreskuratu da hortzetan oinarrituta. Genoma mitokondrial hori U6 basal leinuari dagokio; gaur egun desagertuta dago, eta hortik datoz egun batik bat Afrika iparraldean bizi diren populazioetan dauden U6 leinuak.

Azterlanak, beraz, U6 leinuak jatorri eurasiarra duela berretsi ez ezik, indartu ere egin du Goi Paleolitoan (duela 40-45.000 urte) zenbait populaziok Eurasiatik Afrikara itzultzeko migrazio bat hasi zutela dioen hipotesia. Pestera Muierii gizabanakoak Afrikarako itzulera horren adar bat dira; halere, ez dago haien inguruko ebidentzia zuzenik, Afrika iparraldean Paleolitoko hondakin fosil oso gutxi dagoelako.

"Oraintxe bertan, ikertaldea genoma nuklearra aztertzen ari da; izan ere, azterketaren emaitzek informazioa eman diezagukete gizatalde hark neandertalekin izan zuen harremanari buruz eta sistema immunearekin loturiko aldaera genomikoei buruz. Horrela, argitu ahalko da Homo sapiens espezieak zergatik izan zuen bilakaera arrakastatsua bizikide izan zituen beste giza espezie batzuen aldean. Horrez gain, jakin ahalko dugu nolako ezaugarri fenotipoak zituzten lehendabiziko Homo sapiens gizakiek eta nolako eragina izan zuten iraganeko populazio mugimenduek gure eboluzioaren historia ulertzeko moduan", azaldu du Concepción de la Rúa katedradunak.

Iturria: UPV/EHU Campus aldizkaria

https://vimeo.com/167393987

http://www.ehu.eus/eu/campusa/albisteak/-/asset_publisher/R8pu/content/n_20160519_investigacion-migracion?_101_INSTANCE_R8pu_redirect=http://www.ehu.eus/es/campusa%3Fp_p_id%3D101_INSTANCE_sK0m%26p_p_lifecycle%3D0%26p_p_state%3Dnormal%26p_p_mode%3Dview%26p_p_col_id%3Dcolumn-1%26p_p_col_count%3D9

1 -tik 21 -rako elementuak erakusten, guztira:185
top