Bordes, Laurent

Laurent Bordes-ek Matematikan eta Mekanikan Maisutza (MATMECA) lortu zuen Bordeleko Unibertsitatean 1992an. 1996an Matematikan lortu zuen doktoregoa, Mikhail Stepanovitx Nikouline profesorearen ikuskaritzapean.

Doktoregoa lortu ondoren Bordeleko Unibertsitateak  irakaskuntza eta ikerketako aldi baterako irakasle elkartu gisa kontratatu zuen. Matematikako irakasle izendatu zuten 1997an eta UTC Compiègne-ko Unibertsitate Teknologikoan hasi zen lanean.

2006an matematika aplikatuko unibertsitate-irakasle izendatu zuten UPPA/PU Paueko eta Aturrialdeko Unibertsitatean. LMAP Matematikako eta beraren Aplikazioetako Paueko Laborategiko kidea da; UMR CNRS Informatikako eta Automatikako Ikerketako Institutu Nazionalera lotuta dago laborategia, eta bere ikerketak datu faltanteak dauzkaten iraupen-ereduak eta banaketen amaitutako nahasketetarako eredu erdiparametrikoak ditu ardatz gisa.

Graduko eta masterreko irakaskuntza eman du Paueko eta Aturrialdeko Unibertsitatean, Arte eta Lanbideen Kontserbatorio Nazionalean, baita master bat ere Beninen, proiektu europar baten esparruan.

2012an Mohamed Amara UPPA/PUko errektore aukeratu zutenean, unibertsitateko ikerketako presidenteorde aukeratu zuten Laurent Bordes, eta kargu hori bete zuen 2016ra arte. IPRA Petrolioaren Ingeniaritzako Ikerketa Aplikatuko Diziplina anitzeko Institutuko presidente bihurtu zen urte horretan, matematika, ingeniaritzaren zientziak eta bost ikerketa-unitateren geozientziak biltzen dituen erakundeko presidente, hain zuzen ere.

Urte horretan bertan, UPPA/PUko gai digitaletako presidenteorde delegatu aukeratu zuten, baita Akitaniako unibertsitate eta ikastetxeen elkargoari dagokionez ere, eta Akitania Berriko eskualdeko goi-mailako irakaskuntzako eta ikerketako ikastetxe guztien artean partekatutako datu-zentroko proiektu baten buru da elkargo horren kudeaketan.

UPPA/PUk 2018an izan zuen berrantolaketaren ondoren, STEE Energiaren eta Ingurumenaren Zientzia eta Teknologiako Goi-mailako Eskola berriaren zuzendaritza hartu zuen bere gain, non Paueko eta Angeluko departamenduetako zientzia eta teknologiako eskola zaharreko, ENSGTI Industria Teknologietako Ingeniaritza Eskola Nazionaleko, ISABTP Akitaniako Eraikuntza eta Obra Publikoetako Goi-mailako Institutuko, eta Aturrialdeko eta Baionako bi IUT unibertsitate-institutu teknologikoetako 5.000 ikasle inguru biltzen diren.

Laurent Bordes UPPA/PUko errektorea da 2021eko urtarrilaren 1az geroztik.